د کابل ولایت په ده سبز ولسوالۍ کې د ۲۵ زره جریبه ځمکې د تصفیې او مالکیت حق د تثبیت چارې پیل شوې
د افغانستان اسلامي جمهوريت جلالتمآب جمهور رئیس د لارښونې او د ښار جوړولو او ځمکو وزارت د مشرتابه د ژمنې سره سم، د کابل ولایت په ده سبز ولسوالۍ کې د ۲۵ زره جریبه ځمکې د تصفیې او مالکیت حق د تثبیت چارې پیل شوې.
دا کار د نوي کابل ښار د جوړولو په موخه، چې د ښار جوړولو او ځمکو وزارت یو له مهمو پروژو څخه ده ترسره کیږي.
د کابل نوي ښار جوړول د انجنیري او مهندسي معیارونو او د سیمې په کچه د نورمونو او سټنډردونو سره سم؛ د ښار جوړولو او ځمکو وزارت د مشرتابه له کاري لومړیتوبونو څخه دی او دا وزارت په پام کې لري چې د حکومت له اړونده سکټوري ادارو سره په همغږۍ د دې مهمې پروژې د تطبیق زمینه برابره کړي.
یاد وزارت د موجوده ظرفیتونو او د بهرنیو متخصصینو او شرکتونو د تجربې څخه په استفادې؛ ژمنه لري چې د کابل نوی ښار په معیاري توګه جوړ کړي، څو هېوادوالو ته د ښه ژوند زمینه برابره شي.
ښار جوړولو او ځمکو وزارت د کابل نوي ښار د ځمکې د تصفیې او د مالکیت حق د ثبیت چارو له بشپړېدو او همدارنګه د تفصیلي پلان په جوړونې او منظورۍ سره؛ په پام کې لري، د دې ښار زیربناوې لکه سړکونه او پلي لارې، د کانالیزاسیون منظم سیسټم، د اوبو زیرمې او شبکې، د برق منظم سیسټم او نورو مهمو مواردو له جوړولو وروسته د دې ښار ساختماني چارې پیل کړي.
د دې مهمې پروژې په تطبیق سره به د کابل اوسېدونکي د سیمې په کچه د یوه معیاري ښار شاهدان و اوسي.
###
