د کابل ولایت شکردرې ولسوالۍ کې د ښاري سرغړونو د مخنیوي په موخه څارنه ترسره شوه
۱۴۴۷/۹/۲۳
د کور او ښار جوړولو وزارت د ښاري سرغړونو د مخنیوي د عمومي ریاست په لارښوونه، د ښاري سرغړونو د رسېدنې ریاست اړوند د نظارت، عامه پوهاوي او ولسوالیو آمریتونو ګډو ټیمونو د کابل ولایت شکردرې ولسوالۍ کې د ښاري سرغړونو د څارنې او ارزونې بهیر ترسره کړ.
د دې نظارت موخه د کابل – شمال عمومي سړک په شاوخوا سیمو کې د هغو تولیدي شرکتونو او فابریکو پېژندنه او ارزونه وه، چې د ډبرو د تراش، د اوسپنې د ویلې کولو، پلاستیک، ګاز او نورو صنعتي فعالیتونو په برخو کې فعالیت کوي او په یادو سیمو کې په غیرپلاني ډول جوړې شوې دي.
د مسؤلینو په وینا، دا نظارت د دې لپاره ترسره شو چې په یاده سیمه کې د صنعتي فعالیتونو د غیرمنظم پراختیا مخه ونیول شي؛ ځکه د ښار جوړونې د قوانینو او مقرراتو له مخې صنعتي فابریکې او تولیدي فعالیتونه باید یوازې په هغو ټاکل شویو ساحو کې ترسره شي چې د صنعتي ښارګوټو لپاره ځانګړې شوې وي.
د نظارت پر مهال د فابریکو د فعالیت ځایونه او د فعالیت ډولونه وپېژندل شول او په اړه یې لومړني معلومات راټول شول. همداراز د فابریکو له مالکینو څخه وغوښتل شول چې د خپلو فعالیتونو اړوند اسناد او جوازونه وړاندې کړي، څو د ارزونې تر بشپړېدو وروسته د ښار جوړونې د نافذه قوانینو له مخې په اړه یې لازمې پرېکړې وشي.
د ښاري سرغړونو د مخنیوي عمومي ریاست د ښار جوړونې د قوانینو د تطبیق او د غیرقانوني ساختماني او صنعتي فعالیتونو د کنټرول مسؤلیت لري او په دوامداره توګه د هېواد په بېلابېلو سیمو کې نظارتي بهیر ترسره کوي.
