د ښار جوړولو او ځمکو وزیر د پروان ولایت چاریکار ښار د معلم سید قیوم سیمې د پرمختیا عمومي پلان منظور کړ
د ښار جوړولو او ځمکو وزیر محترم محمود کرزي له پروان ښاروال ښاغلي خواجه روحالله صدیقي سره په لېدنه کې چې د دې وزارت د مسکن چارو مرستیال ښاغلي عزیز احمد ګلستاني، د غیر پلاني سیمو د پرمختیا رئیس ښاغلي انجنیر مولودالدین پوپل او د پروان د ښار جوړولو او ځمکو رئیس پهکې ګډون درلود، د احمد شاه مسعود ښارګوټي ته څېرمه د پروان ولایت چاریکار ښار د معلم سید قیوم سیمې د پرمختیا عمومي پلان منظور کړ.
په پیل کې د ښار جوړلو او ځمکو وزارت د مسکن چارو مرستیال د غیر پلاني سیمو سروې او ثبت په اړه وویل، د دې سیمو اوسېدونکیو د ملکیت خوندیتوب په موخه یې د غیر پلاني او غیر رسمي سیمو ثبت پیل کړی دی او په وینا یې د دې سیمو د پرمختیا او بیا جوړولو پالیسي په پلي کېدو سره غوره اقتصادي ودې ته هم فرصتونه برابرېږي.
ورپسې د ښار جوړولو او ځمکو وزیر د معلم سید قیوم سیمې د پرمختیا عمومي پلان منظوري د دې سیمې د پرمختیا لپاره حیاتي ګام وباله او زیاته یې کړه چې دا پلان به د پرمختیايي پروژو پلي کېدو او په چاریکار کې د معلم سید قیوم سیمې اوسېدونیکو په ژوند کې د اسانتیا رامنځته کېدو تر څنګ اقتصادي او ټولنیزې ودې ته هم زمینه برابره کړي.
وروسته د پروان ښاروال د پروان ولایت چاریکار ښار د معلم سید قیوم سیمې د پرمختیا عمومي پلان ترتیب او منظورول د دې سیمې اوسېدونکیو لپاره د پرمختیا په برخه کې مهم ګام یاد کړ او د ښار جوړولو او ځمکو وزارت له هر اړخیزې پاملرنې او همکارۍ څخه یې مننه وکړه.
د یادولو ده چې د پرمختیايي پلانونو له ترتیب څخه موخه د غیر رسمي سیمو د پراختیا مخنیوی، د ښاري کلتور لوړول، د ټولنیز وضعیت ښه کول، کارموندنې ته زمینه برابرول او همداراز د دې سیمو اوسېدونکیو لپاره د تلپاتې او خوندي زېربناوو د جوړولو کیفیت لوړول او د ښاري چوپړتیاوو وړاندې کول دي.
