د ښار جوړولو او ځمکو وزارت سرپرست د ننګرهار له مرستیال والي سره وکتل
۱۴۴۴/۰۲/۰۷
د ښار جوړولو او ځمکو وزارت محترم سرپرست وزیر مولوي حمدالله نعماني ننګرهار ته په رسمي سفر کې د یاد ولایت له مرستیال والي مولوي محمد رباني ناصح سره وکتل او پر یو شمېر موضوعاتو یې خبرې وکړې.
د ننګرهار مرستیال والي ښاغلي مولوي محمد رباني ناصح د ښار جوړولو او ځمکو وزارت محترم سرپرست مولوي حمدالله نعماني او ورسره تخنیکي ټیم ته ښه راغلاست وویل او د پروژو وضعیت ارزونې په موخه یې ورسره ملتیا وکړه.
په هغه ناسته کې چې د ننګرهار ولایت په مقام کې وشوه، په ننګرهار کې د ښار جوړولو او ځمکو وزارت اړوند ټولګټو پروژو په اړه خبرې وشوې، چې څنګه کېدای شي په ټپه ولاړې پروژې بېرته پیل او ګټې اخیستنې ته وسپارل شي.
د ښار جوړولو او ځمکو وزارت د ننګرهار ولایت اهمیت او اړتیا په کتو یادونه وکړه چې باید هر اړخیزه ښاري پراختیا او وده رامنځته شي او خلکو ته اسانتیاوې برابرې شي.
د ننګرهار مرستیال والي محترم مولوي محمد رباني ناصح وویل، په دغه ولایت کې به د ټولو رغنیزو او ټولګټو پروژو د پلې کولو لپاره زمینه برابره کړي او دغه برخه کې به تر خپلې وسې او مسؤلیت همکاري وکړي.
