د ښار جوړولو او ځمکو وزارت سرپرست د لغمان له ښاروال سره وکتل
۱۴۴۳/۱۰/۲۰
د ښار جوړولو او ځمکو وزارت محترم سرپرست مولوي حمدالله نعماني په خپل کاري دفتر کې د لغمان ولایت ښاروال مولوي عبیدالله او د دغه ولایت د ښار جوړولو او ځمکو رییس مولوي حسین احمد سره وکتل او په یو شمېر موضوعاتو یې خبرې وکړې.
په دغه لیدنه کې د لغمان ښاروال مولوي عبیدالله د ښار جوړولو او ځمکو وزارت د سرپرست مولوي حمدالله نعماني مدبرانه کړنې وستایلې او یادونه یې وکړه چې د لغمان مرکز او ولسوالۍ د تفصیلي او ستراتېژیکو پلانونو ترڅنګ د ښاري پلانونو تطبیق او ښاري بیخ بناوو ته جدي اړتیا لري.
دغه راز د لغمان د ښار جوړولو او ځمکو رییس مولوي حسین احمد د لغمان د ښاروال د خبرو په تائید زیاته کړه چې په دغه ولایت کې یې په غیر کرنیزو ځمکو کې د هستوګنیزو نمرو په شکل د ښارګوټو رامنځته کولو طرحه ترتیب کړې چې بې سرپناه خلکو ته به په کمه بیه سرپناه برابره شي، خلکو ته به خدمات وړاندې شي، د دولت عواید به ورسره لوړ شي او دغه راز به خلکو ته د کار کولو زمینه برابره شي.
په یاده ناسته کې ګډون کوونکو په لغمان ولایت کې د مخکیني حکومت لخوا د بشپړ شوو او نیمه کاره پاتې پروژو د اداري، تخنیکي او حقوقي ستونزو په اړه وزیر ته یادونه وکړه او د حل برخه کې یې د اقداماتو غوښتنه وکړه.
د لغمان مېشتو خلکو د خبرو، وړاندیزونو او ستونزو له اورېدو وروسته د ښار جوړولو او ځمکو وزارت محترم سرپرست مولوي حمدالله نعماني وویل، د لغمان ولایت ورته لومړیتوب لري او زیاته یې کړه چې د دغه ولایت د ښاري پراختیا او ټولګټو پروژو د پلې کولو برخه کې هڅې زیاتې کړي او له خلکو یې غوښتنه وکړه چې د هستوګنیزو ښارګوټو جوړولو برخه کې دې وزارت ته رسمي وړاندیزونه او طرحې وړاندې کړي.
