د ښار جوړولو او ځمکو وزارت سرپرست د غور له والي سره وکتل
۱۴۴۳/۱۰/۲۱
د ښار جوړولو او ځمکو وزارت محترم سرپرست مولوي حمد الله نعماني په خپل کاري دفتر کې د غور له والي ښاغلي مولوي احمد شاه دین دوست او مل هیئت سره وکتل او د غور ولایت د ښاري پلان او ښاري ستونزو پر حل یې خبرې وکړې.
لومړی د غور محترم والي مولوي احمد شاه دین دوست د یاد ولایت د ښاري وضعیت په اړه معلومات وړاندې کړل، د خلکو ښاري ستونزې او ننګونې یې په ګوته کړې او په ټوله کې یې غوښتنه وکړه چې د ښار جوړولو او ځمکو وزارت دې ورسره د ښاري پراختیا او ښاري پلان په تطبیق کې همکاري وکړي، تر څو پّ دغه برخو کې شته ستونزې حل شي.
ورپسې د ښار جوړولو او ځمکو وزارت محترم سرپرست مولوي حمد الله نعماني یادونه وکړه چې وزارت به یې د غور ولایت د خلکو ستونزو او اړتیاوو ته په کتو د ښاري وضعیت په ښه کېدو او د غور ښار پراختیا برخه کې مهم رول ولوبوي چې د خلکو ستونزې به ورسره راکمې شي.
ښاغلي وزیر مولوي حمد الله نعماني زیاته کړه چې د ښار جوړولو او ځمکو وزارت هڅې پیل کړي چې څنګه کولی شي د ټول هېواد په کچه د هېوادوالو ښاري ستونزې ختمې او د وخت سره سم په معیارونو برابر ښارونه جوړ کړي.
