د ښار جوړولو او ځمکو وزارت د عوایدو مدیریت دې لا غښتلی شي
۱۴۴۳/۱۰/۱۴
د ښار جوړولو او ځمکو وزارت مالي او اداري مرستیال محترم حافظ محمد امین فاروقي د یاد وزارت د عوایدو ریاست له مسؤلینو او کارکوونکو سره په ناسته کې د دغه ریاست فعالیتونه، لاسته راوړنې او ستونزې وارزولې.
ښاغلي مالي او اداري مرستیال وویل، د ادارتو عایداتي سرچینې په اصل کې د مالي برخې ملاتړې او د ملا د تیر حیثیت لري چې څومره هم دقت او پاملرنه زیاتېږي په هماغه کچه مالي سرچینې پیاوړې او باثباته کېږي.
نوموړي زیاته کړه چې د روان کال مالي بودیجه په داخلي عوایدو تکیه ده او موږ باید هڅه وکړو چې د عوایدو راټولېدو برخه کې شفافیت او عدالت په پام کې ونیسو.
ښاغلي حافظ محمد امین فاروقي د خپلو خبرو پر دوام وویل، چې د ا.ا.ا اساس د اسلام مبارک دین دی او باید ټولې کړنې مو پر دیني او ملي ارزښتونو سمبالې وي.
هغه سپارښتنه وکړه چې باید د عوایدو مدیریت لا غښتلی او تر جدي کنترول لاندې ونیول شي.
