د ښار جوړولو او ځمکو سرپرست وزیر د پنځم مکروریانو له استوګنيزې پروژې ليدنه وکړه
د ښار جوړولو او ځمکو سرپرست وزیر محترم محمد جواد پيکار له یو شمېر تخنیکي رئيسانو، د سیمې د ګذر وکیلانو او اوسېدونکیو سره يو ځای د پنځم مکروريانو له استوګنيزې پروژې څخه لیدنه وکړه.
د ښار جوړولو او ځمکو سرپرست وزیر د یادې پروژې په لومړي فاز کې له شپږو بلاکونو څخه د لیدنې پر مهال د دغې پروژې تخنیکي او په چاپېریال کې د شته ستونزو ارزونه وکړه.
محترم محمد جواد پيکار د ښار جوړولو او ځمکو وزارت د مسکن تخنيکي رياست ته دنده وسپارله چې د لومړي فاز زیربناسازۍ پلان جوړ کړي او د بشپړو معلوماتو تر راټولولو وروسته دې د ښار جوړولو او ځمکو وزارت له لارې د زېربناسازۍ کارونه پیل کړي.
د ښار جوړولو او ځمکو سرپرست وزیر همدارنګه د دې استوګنيزې پروژې قراردادي شرکت ته لارښوونه وکړه چې تر هر څه ژر د نيمګړو بلاکونو چارې پیل کړي، څو په لنده موده کې د خلکو د مېشتېدو زمینه برابره شي.
محترم محمد جواد پيکار په ورته وخت کې د پنځم مکروریان آمریت او قراردادي شرکت ته دنده وسپارله چې د خلکو د خونديتوب لپاره د دې استوګنيزې پروژې B1 او B2 بلاکونو محوطه دې په فېنس خوندي او د خاورو ډېرې دې بل ځای ته انتقال کړي.
د ښار جوړولو او ځمکو سرپرست وزیر د سیمې له اوسېدونکیو او د ګذر له وکیلانو سره په لیدنه کې د هغو ستونزو او نظریاتو په اورېدو سره اړوندو برخو ته لارښوونه وکړه چې ژر تر ژره دې د B1 او B2 بلاکونو مخې ته مېشتو کورنیو بیا مېشتېدنې او د هغو ستونزو هواري په برخه کې لاس په کار شي.
محترم محمد جواد پیکار په ورته وخت کې د سیمې اوسېدونکیو او د ګذر وکیلانو ته ډاد ورکړ چې د ښار جوړولو او ځمکو وزارت د یادې پروژې په کچه د شته ستونزو هواري په برخه کې په قاطعیت ګام اخلي او په دې برخه کې د هغو د مرستې غوښتنه هم وکړه.
د پنځم مکروريان استوګنیزې پروژې چارې په وروستیو څو کلونو کې د حقوقي او تخنیکي ستونزو له کبله درېدلې وې، خو اوس د ښار جوړولو او ځمکو وزارت د پرله پسې هڅو په پایله کې یو وار بیا پیل او په لنډ وخت کې به بشپړ شي.
د پنځم مکروريانو استوګنيزې پروژې لومړی فاز په ۳۱ جريبه ځمکه کې جوړ شوی چې د لسو بلاکونو له ډلې د شپږو هغو ۹۰ سلنه چارې بشپړې شوي او تمه ده چې د څلورو نورو عملي چارې هم ډېر ژر پیل شي.
