د ځمکو برخه کې د پانګونې په موخه د ملي او نړیوالو پانګوالو ستونزې حل کېږي
۱۴۴۳/۱۰/۲۲
د ښار جوړولو او ځمکو وزارت محترم مالي او اداري مرستیال حافظ محمد امین فاروقي د (بورک اونسال) په نوم د ترکیې هېواد له یو پانګوال سره وکتل.
په دغه لیدنه کې ښاغلي محمد امین فاروقي ترکي پانګوال ته یادونه وکړه چې افغانستان کې تر بل هر وخت د پانګونې لپاره منناسبه فضاء برابره شوې، سرتاسري امنیت تأمین شوی، اقتصاد محوره تګلاره رامنځته شوې چې ملي او نړیوال پانګوال کولی شي په ارام زړه پانګونه وکړي.
ښاغلي حافظ محمد امین فاروقي زیاته کړه، د ښار جوړولو او ځمکو وزارت د یو سکتوري وزارت په توګه په ښاري پراختیا او اقتصادي ودې برخه کې د پانګوالو ملاتړ کوي او د پانګې جذب په موخه د ځمکو په تثبیت او وېش کې همکاري کوي.
ورپسې ترکي پانګوال بورک اونسال په افغانستان کې د پانګونې لپاره د مناسبو شرایطو یادونې ترڅنګ هغه لارو چارو ته اشاره وکړه چې له مخې یې د یو شمېر پانګوالو چارې اسانه کېږي.
د ښار جوړولو او ځمکو وزارت مالي او اداري مرستیال اړوندو څانګو ته دنده وسپارله چې د پانګوالو د ستونزو حل برخه کې کوټلي ګامونه پورته کړي.
