د پیروزي امارتي ښارګوټي نوم بدلون وموند او له دې وروسته په نوي نوم ونومول شو
۱۴۴۷/۸/۶
د کور او ښار جوړولو وزارت د هغه هڅو په لړ کې چې درنو هېوادوالو ته د معیاري او مناسب مسکن او سرپناه زمینه برابره کړي، ګام په ګام پرمختګونه لیدل کېږي.
هغه امارتي استوګنیز ښارګوټی چې د پیروزي په نوم یې شهرت درلود او چارې یې نیمه کاره پاتې وې، په نوي نوم ونومول شو چې د تازه اقداماتو شاهد به وي او نوې ساه به واخلي.
د کور او ښار جوړولو وزارت د محترم وزیر الحاج مولوي نجیب الله حیات حقاني په وړاندیز او د عالیقدر امیرالمؤمنین الشیخ هبة الله اخندزاده حفظه الله په منظورۍ د پېروزي ښارګوټی له دې وروسته د (الشیخ ښارګوټي) په نوم ونومول شو.
الشیخ ښارګوټی د نوي کابل ښار په لومړي فاز کې شامل دی، چې په (۸۶۶۵) جریبه ځمکه کې ډیزاین شوی دی.
الشیخ ښارګوټی د کور او ښار جوړولو وزارت د پالیسۍ سره سم د استوګنې په برخه کې یو مهم ښارګوټی دی، تر څو بې سرپناه او اړمن هېوادوال وکولای شي د معیارونو سره سم، د لازمو اسانتیاوو او عامه خدماتو په لرلو سره استوګنځای ته لاسرسی ومومي.
په دې سره به، د غیر پلاني او خپل سرو کورونو له جوړولو مخنیوی وشي، سالم چاپېریال رامنځته شي، د استوګنې د مخ په زیاتېدونکي بحران کچه به راکمه شي، د پانګونې او خلکو ته به د کارموندنې زمینه برابره شي او په ټوله کې به د اسلامي انجنیرۍ او ښار جوړولو له معیارونو سره سم ښارګوټی جوړ شي.
په دې پروژه کې (۹۱۳۰) استوګنیزې نمرې شاملې دي چې په شپږو فازونو وېشل شوې دي.
دغه راز، د الشیخ استوګنیز ښارګوټی (۴۱۷) بلاکونه لري چې استوګنیز، سوداګریز، تفریحي پارکونه، شنې سیمې، صنعتي پارک او ښاري خدمات په کې شامل دي.
