د پکتیکا په مرکز ښرنه کې د درې جوماتونو د جوړېدو چارې وڅارل شوې
۱۴۴۷/۰۳/۲۲
د پکتیکا ولایت د کور او ښار جوړولو ریاست د تخنیکي انجینرانو ټیم د مرکز ښرنې په کچه د درې جوماتونو له ودانیزو چارو څارنه وکړه.
ښاغلي مولوي سیف الجهاد وویل، د څارنې پر مهال څرګنده شوه چې د دویمې حوزې جومات د دوهم پوړ د پایو قالب بندي، سیخ بندي او کانکریټ ریزي د نقشې سره سم بشپړ شوي دي، چې د ښاروالۍ جومات د دوهم پوړ د بیمونو او سلب قالب بندي او سیخ بندي بشپړې شوې، او د لومړي منزل د خښتو ایښودلو چارې د نقشې مطابق روانې دي.
د نوموړي په خبره،همدارنګه د مامورینو جومات د ګنبد قالب بندي بشپړه شوې او د سیخ بندي چارې یې په جریان کې دي، چې د څارنې پر مهال یو شمېر ستونزې هم تر سترګو شوې چې د ریاست استازو اړونده شرکت ته د سمون لارښوونې وکړې.
د یادولو وړ ده، چې د کور او ښار جوړولو وزارت او اړوند ریاستونه د هېواد په کچه د پروژو د معیاري پلي کېدو لپاره جدي هڅې کوي او د جوماتونو د رغونې پروژې نه یوازې د دیني ارزښتونو د پیاوړتیا لپاره مهمې دي، بلکې د ښارونو د ښېرازۍ او د خلکو د اړتیاوو د پوره کولو لپاره هم ځانګړی اهمیت لري.
