د پکتیا ولایت د مهاجرینو ښارګوټي اړوند د سړکونو جوړولو پلان منظور شو
۱۴۴۷/۷/۲۴
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې د پکتیا ولایت د مهاجرینو ښارګوټي اړوند د سړکونو د جوړولو پلان لاسلیک او منظور کړ.
یاد پلان د ښارګوټي د بنسټیزو زیربنایي اړتیاوو د پوره کولو په موخه ترتیب شوی، چې په کې د داخلي او اصلي سړکونو جوړښت، د تګ راتګ اسانتیاوې، او د ښاري اصولو سره سم انجینري ډیزاین شامل دي.
د دې پروژې له تطبیق سره به د ښارګوټي بڼه منظمه شي او د اوسېدونکو ورځنی ژوند به اسانه شي.
محترم وزیر مولوي نجیب الله حیات حقاني تمه لري، چې د یادو سړکونو عملي کېدل به نه یوازې د ښارګوټي د اوسېدونکو د تګ راتګ ستونزې هوارې کړي، بلکې د اقتصادي فعالیتونو، سوداګرۍ، او ټولنیزو خدمتونو د پراختیا لپاره به هم زمینه برابره کړي.
نوموړی فکر لري، چې د سړکونو جوړول د ښارګوټي د دوامدار پرمختګ یو مهم ګام دی او د وزارت هڅه دا ده، چې دا ډول پروژې په معیاري، شفاف او پر وخت تطبیق شي.
په دې سره به د راستنېدونکو مهاجرینو لپاره مناسب او باعزته استوګنیز چاپېریال رامنځته شي.
د یادونې وړ ده، چې د پکتیا د مهاجرینو ښارګوټی د ډېر شمېر راستنېدونکو مهاجرو هېوادوالو کوربه دی، او د دغه پلان تطبیق به د ښاري خدمتونو د ښه کېدو ترڅنګ د سیمې پر عمومي پرمختګ هم مثبت اغېز ولري.
