د پراختیایي پروژو او برنامو ستونزې واورېدل شوې او په اړه یې ارزونه کېږي
۱۴۴۳/۰۹/۰۸
د ښار جوړولو او ځمکو وزارت سرپرست محترم مولوي حمد الله نعماني د یاد وزارت اړوندو پراختیایي پروژو او برنامو له مسؤلینو سره وکتل او د پروژو اړوند ستونزې او ننګونې یې وارزولې.
لومړی د وزارت اړوندو پروژو مسؤلینو د خپلو فعالیتونو او ستونزو په اړه بشپړ معلومات وړاندې کړل او دغه راز یې د هغه نیمګړو پروژو د کار دوام په اړه د لارښوونې غوښتنه وکړه چې په تېر حکومت کې پیل شوې وې او د بېلا بېلو دلایلو له امله په ټپه ولاړې دي.
ورپسې د ښار جوړولو او ځمکو وزارت سرپرست ښاغلي مولوي حمد الله نعماني هر اړخیزې خبرې وکړې او د شته ستونزو د حل لپاره یې اړوند مسؤلینو ته لازمې لارښوونې وکړې.
نوموړي اړوند مسؤلینو ته سپارښتنه وکړه چې د ټولو پروژو په اړه بشپړه او هر اړخیزه ارزونه وکړي او د وزارت امکاناتو ته په کتو یې حل لارې پیدا کړي.
ښاغلي نعماني زیاته کړه چې نباید عام خلک زینمن شي او نه پراختیایي پروژې بې برخلیکه پاتې شي.
