د نیله باغ استوګنیزې پروژې چارې د قناعت وړ او په چټکۍ روانې دي
۱۴۴۶/۱۱/۵
د کور او ښار جوړولو وزارت د پروژو د انسجام ریاست محترم رئیس انجنیر عبدالوهاب صدیقي وایي، د نیله باغ استوګنیزه پروژه کې ودانیزې چارې په نورمال شکل روانې دي چې د قناعت وړ دي.
ښاغلی انجنیر صدیقي وایي، ودانیزې چارې د پلان مطابق په (۵۶) بلاکونو کې په بېلا بېلو پړاونو کې روانې دي.
نوموړی وایې، په ټوله کې د یادې پروژې فزیکي چارې دېرش (۳۰٪) سلنه مخکې تللي، چې لا هم دوام لري.
د هغه په خبره، د (۵۶) بلاکونو لپاره ځمک شکونه، د تهکاویو کانکرېټ، په اتلس بلاکونو کې د خښتو لګولو چارې، په شپږ بلاکونو کې د پي، وي سي کړکو نصبول، په پنځه بلاکونو کې د فاضله اوبو او پاکو اوبو رسولو د پایپونو غځول، په ټولو بلاکونو کې د دېوالونو عایق کاري او داسې نورې چارې بشپړې شوې دي.
د کور او ښار جوړولو وزارت هڅې کوي چې د ودانیزو پروژو چارې د پلان او نقشې مطابق په خپل وخت سرته ورسوي.
یاده پروژه د چین هېواد په بلاعوضه مرسته د څه باندې (۷۱) میلیون امریکایي ډالرو په لګښت جوړېږي.
