د نوي کابل ښار په محدوده کې د سرطاني ناروغانو د طبي کمپلکس د تخنیکي کمېټې غونډه ترسره شوه
۱۴۴۷/۸/۲۸
د سرطاني ناروغانو د طبي کمپلکس د تخنیکي کمېټې غونډه، چې ټاکل شوې ده د عطا خیریه بنسټ له لوري د نوي کابل ښار په محدوده کې جوړه شي، د مسکن، ساختماني چارو او د برنامو د پراختیا معینیت د مقرراتو او انجینري طرحو د نظام محترم رئیس په مشرۍ ترسره شوه.
په دې غونډه کې، چې د تخنیکي کمېټې یو شمېر غړو او د عطا خیریه بنسټ مسؤلینو ګډون کړی و، د یاد طبي کمپلکس د (ټي او ار) او نقشو د طرحې په اړه بحث او نظرونه شریک شول.
په دغه ناسته کې پرېکړه وشوه، چې د عامې روغتیا محترم وزارت به د یاد کمپلکس د (ټي او ار) او نقشو د طرحې په تړاو خپلې نظریې له تخنیکي کمېټې سره شریکې کړي، تر څو د ډیزاین تر بشپړېدو وروسته د یادې پروژې موضوع د ویزې په موخه د کور او ښار جوړولو محترم وزارت سره همغږي شي.
همدارنګه، په دې غونډه کې پرېکړه وشوه، چې د یاد طبي کمپلکس د عملي چارو د پیل لپاره به د عطا خیریه بنسټ په نوم یو کاري دفتر جوړ شي.
د یادونې وړ ده، چې دغه روغتون به د نوي کابل ښار په محدوده کې په یوولسو جریبه ځمکه کې جوړ شي، چې د احاطې چارې یې هم بشپړې شوې دي.
