د نوي کابل ښار لومړي فاز الف برخې د پلان ارزونه او د تطبیق پر لارو چارو خبرې وشوې
۱۴۴۶/۰۴/۲۵
د کور او ښار جوړولو وزارت محترم سرپرست وزیر الحاج شیخ حمدالله نعماني، د نوي کابل ښار د پراختیا محترم رئیس انجنیر اقبال میرزاده او نورو اړوندو محترمو رئیسانو او مسؤلینو سره وکتل.
په دغه کتنه کې، په نوي کابل ښار کې د شته پلان ارزونه وشوه او د تطبیق پر لارو چارو یې خبرې اترې وشوې، چې څنګه کېدای شي حقوقي او تخنیکي ستونزې یې له مخکې حل شي.
ښاغلي سرپرست وزیر وویل، اړتیا ده چې د نوي کابل ښار د پراختیا ریاست اړوند ځینې مسؤلین عملاً په ساحه کې فعالیت وکړي، تر څو د پلان له تطبیق څخه په سمه توګه څارنه وکړي.
ښاغلي شیخ نعماني وویل، د حقوقي اعتبار ورکولو ریاست دې، د تړونونو او عملي چارو هر اړخیزه څېړنه وکړي، ټولې حقوقي ستونزې دې یې حل کړي، چې په وینا یې د ستونزو د نشتون په صورت کې پانګوال شرکت ته د عملي چارو اجازه ورکړل شي.
نوموړي وویل، د عامو خلکو او پانګوال شرکت ترمنځ د راتلونکو پېښېدونکو حقوقي منازعاتو او شخړو مخنیوی دې وشي، چې نه شرکتونه یوه نمره دوه یا درې ځله وپلوري او نه خلک د ځمکې د ورکړې او له هغې وروسته د عملي چارو خنډ او ځنډ لامل وګرځي.
ښاغلي وزیر الحاج شیخ حمدالله نعماني زیاته کړه، هغه اشخاص چې پانګوال شرکت ترې ځمکه اخلي باید له ټولو اړخونو سره له وزارت سره ثبت او راجستر شي.
دغه راز، د چارو د لا ښه پرمختګ او ستونزو د نه پېښېدو لپاره دې له اړوندو امارتي ادارو سره د همغږۍ او همکارۍ روحیه لا پیاوړې شي او یو د بل له تجربو دې ګټه پورته کړي.
سرپرست وزیر، اړوندو ریاستونو ته دنده وسپارله چې هر ریاست دې په خپل کاري استقامت کې خوځښت وکړي او د عملي چارو د اسانتیا لپاره دې ډاډ ترلاسه کړي.
