د نوي کابل ښار د بېرته پیلولو په تړاو ګډې کمېټې خپله لوړنۍ ناسته وکړه
۱۴۴۳/۱۰/۲۸
د ښار جوړولو او ځمکو وزارت محترم مالي او اداري مرستیال حافظ محمد امین فاروقي په مشرۍ د نوي کابل ښار د چارو د بېرته پیلولو په تړاو ګډې کمېټې په ناسته کې د وزارت مسؤلینو او د نوي کابل ښار پانګوالو او پراختیا ورکوونکو خپل لومړني نظریات سره شریک کړل.
د ګډې کمېټې په دغه لومړنۍ ناسته کې د نوي کابل ښار د چارو بیا فعالیت په موخه پر ستونزو او ننګونو خبرې وشوې او ټینګار وشو چې باید ژر تر ژره شته ستونزې او ننګونې ختمې او چارې په نورماله توګه پیل شي.
د ستونزو او ننګونو د ارزونې په موخه کمېټې ته دنده وسپارل شوه چې د نوي کابل ښار په تړاو به هر اړخیز حقوقي، تخنیکي، مالي او اقتصادي اړخونو تر دقیقې څېړنې لاندې نیسي، ستونزې او نیمګړتیاوې به په ګوته کوي او د حل لپاره به یې د کمېټې مشرتابه ته وړاندیزونه کوي.
د شار جوړولو او ځمکو وزارت محترم مالي او اداري مرستیال حافظ محمد امین فاروقي د کمېټې ګډونوالو ته سپارښتنه وکړه چې د اصولو او مقرراتو سره سم دې خپلې څېړنې بشپړې کړي چې ولس، پانګوال او دولت زیانمن نه شي او چارې ژر تر ژره پیل شي.
نوموړي یادونه وکړه چې د ښار جوړولو او ځمکو وزارت د محترم سرپرست مولوي حمدالله نعماني د لارښوونې سره سم باید هڅه وشي چې اسانتیاوې رامنځته شي او بې سرپناه خلک د سرپناه خاوند او ښار منظم شي.
د یادې په ناسته کې پرېکړه وشوه چې تر هر اړخیزې څېړنې او ارزونې وروسته به په روانه اوونۍ کې خپله دویمه ناسته کوي او د څېړنو موندنې به په دویمه ناسته کې بیانېږي.
د ښار جوړولو او ځمکو وزارت هڅې پیل کړي چې څنګه کېدای شي د نوي کابل ښار چارې ژر تر ژره پیل، خلکو ته خدمات وړاندې او د کار کولو زمینه برابره شي.
