د ننګرهار ولایت د رودات ولسوالی د ښوونکو د ښارګوټي تفصیلي پلان منظور شو
د ښار جوړولو او ځمکو وزارت سرپرست وزیر محترم محمود کرزی د ننګرهار والي سره په لیدنه کې د ننګرهار ولایت د رودات ولسوالی د ښوونکو د ښارګوټي تفصیلي پلان منظور کړ.
د ښار جوړولو او ځمکو وزارت سرپرست وزیر د ښارګوټي جوړول یې د وزارت له کاري لومړیتوبونو څخه وباله او زیاته یې کړه چې د یاد ښارګوټي په جوړېدو سره به د ښوونکو د کور نشتون ستونزه حل شي.
ورپسې د ننګرهار والي محترم شاه محمود میاه خیل د ښار جوړولو او ځمکو وزارت له هر اړخیزه همکارۍ مننه وکړه و زیاته یې کړه چې د پلان په تطبیق سره به د رودات ولسوالۍ د ښوونکو د مېشتېدو هیله پوره شي.
د رودات ولسوالۍ د ښوونکو تفصیلي پلان د ښار جوړولو او ځمکو وزارت له خوا د پوهنې وزارت په مرسته ترتیب شوی چې په دې پلان کې ۱۹۱۷ استوګنیزې نمرې، ۱۱ استوګنیز بلاکونه، ۲۲ مارکیټونه، ۵ جوماتونه، ۲ ښوونځي، ۲ وړکتونونه، ۱ کلینیک، ۱ هوټل، ۴ تفریحي پارکونه، ۵ د برېښنا شبکې، ۵ لوبغالي او یو کتابتون، شنې، عامه او تجارتي سیمې په کې شامل دي.
په پام کې ده چې یاد ښارګوټی په ۶۰۰ جریبه ځمکه کې جوړ شي.
ښار جوړولو او ځمکو وزارت په دې وروستیو کې د ښوونکو ۱۰۳ ښارګوټو تفصیلي پلانونه منظور کړي چې په تطبیق سره به یې نږدې ۱۰۰ زره ښوونکو ته د استوګنې زمینه برابره شي.
###
