د میدان وردګ له ښاروالۍ د ځینو ځمکو د تصفیې، حقوقي او املاکي ستونزو د حل غوښتنه وشوه
۱۴۴۵/۱۱/۱۰
د کور او ښار جوړولو وزارت د هېواد په کچه له ټولو ښاروالیو غواړي چې د تفصیلي او نورو پلانونو د جوړولو په موخه دې لومړی په خپلو ولایتونو کې د سیمو تصفیوي، حقوقي او املاکي ستونزې حل کړي.
میدان وردګ ولایت کې د کور او ښار جوړولو ریاست محترم رئیس مولوي عبدالقیوم سیف العمر وایي، له خپل تخنیکي ټیم سره یو ځای یې د میدان ښار د قول هزاره له سیمې لیدنه وکړه او د (جي، پي، ایس) نښې یې د یادې ساحې د کروکي په موخه ترلاسه کړې، چې نوموړې سیمې ته به تفصیلي پلان جوړ شي.
یاده ساحه، په ستراتېژیک پلان کې هستوګنیزه ښودل شوې او د میدان وردګو محترمې ښاروالۍ غوښتنه کړې، چې تفصیلي پلان دې ورته جوړ شي.
ښاغلي عبدالقیوم سیف العمر وویل، د تفصیلي پلان جوړولو په موخه یې د میدان وردګو له محترمې ښاروالۍ څخه غوښتنه وکړه چې لومړی د یادې ساحې تصفیوي، حقوقي او املاکي ستونزې حل کړي.
د معلوماتو له مخې، د یادې ساحې ځینې برخې غصب شوي او په یوه برخه کې یې د غیرمنظمه توګه هدیره جوړه شوې ده.
