د مسکن برخه کې پر پانګونې بحث وشو
۱۴۴۶/۰۹/۱۵
د کور او ښار جوړولو وزارت د مسکن، ودانیزو چارو او د برنامو پراختیا محترم مرستیال الحاج محمد اسماعیل فائز د پښتني بانک د محترم عامل رئیس عبدالواحد رحیمي سره وکتل.
په دغه کتنه کې چې، د کور او ښار جوړولو وزارت د تخنیکي مسکن ریاست محترم چارسمبالی انجنیر محمد حریف سروري، د پانګونې ریاست محترم چارسمبالی ارشاد عمر، د برنامو د انسجام محترم رئیس انجنیر عبدالوهاب صدیقي، د اقتصادي زونونو د پراختیا ریاست محترم امر ذبیح الله نادري، د وجهي صندوق محترم امر انجنیر عجب خان انس او د پښتني بانک محترم حقوقي مشاور شمس الرحمن ګډون درلود، د مسکن برخه کې پر پانګونې یې خبرې وکړې.
د پښتني بانک مسؤلینو د یاد بانک د دندو او صلاحیتونو په تړاو معلومات وړاندې کړل او زیاته یې کړه چې غواړي د مرابحې له لارې په افغانستان کې د مسکن د رامنځته کولو برخه کې پانګونه وکړي او له کور او ښار جوړولو وزارت سره همکاري وکړي.
ورپسې د کور او ښار جوړولو وزارت مسؤلینو هر یو په نوبت د دغه وزارت په پروژو کې د پانګونې په تړاو معلومات ورکړل او ځینې هغه ځایونه یې ورپه ګوته کړل چې، په اوسمهال کې پانګونې ته چمتو دي.
د کتنې په پای کې د مسکن، ودانیزو چارو او د برنامو پراختیا محترم مرستیال الحاج محمد اسماعیل فائز وویل، د کور او ښار جوړولو وزارت او د پښتني بانک ترمنځ به یو تړون لاسلیک شي چې، په راتلونکي کې هېڅ لوری زیانمن نه شي او هر لوری خپلو دندو او مکلفیتونو ته پاملرن وکړي.
په نږدې راتلونکي کې به دواړه خواوې په ګوته شوې ساحې له نږدې وګوري او تر هر اړخیزو څېړنو وروسته به پر راتلونکو اقداماتو لاس پورې شي.
د کور او ښار جوړولو وزارت له ټولو داخلي او بیروني پانګوالو غوښتنه کوي چې، د دغه وزارت په پروژو کې پانګونه وکړي.
