د لوګر ولایت په پل علم ښار کې د ښاري سرغړونو مخنیوی وشو
۱۴۴۷/۰۷/۱۴
د کور او ښار جوړولو وزارت د ښاري سرغړونو د مخنیوي د عمومي ریاست د لارښوونې له مخې، د لوګر ولایت د کور او ښار جوړولو ریاست د تخلفاتو ته د رسېدنې ټیم د پل علم ښار په پلاني ساحو کې نظارت ترسره کړ.
د ترسره شوي نظارت په ترڅ کې یو شمېر ښاري سرغړونې تشخیص او مخنیوی ترې وشو چې له هغې ډلې د پل علم ښار په پلاني ساحه کې د فاتحهخوانۍ ودانۍ د جوړېدو مخه ونیول شوه، چې یاده ودانۍ د ملي بس په شمالي لوري کې موقعیت درلود، خو د منظور شوي پلان مطابق په خپل ټاکلي ځای نه وه تطبیق شوې او د دوو عامه سړکونو ساحه یې نیولې وه.
د کور او ښار جوړولو وزارت د ښاري نظم، د عامه تاسیساتو د ساتنې او د ښاري پلانونو د سم تطبیق په موخه په دوامداره توګه د هېواد په بېلابېلو ولایتونو کې د ښاري سرغړونو د مخنیوي لپاره نظارتي کړنې ترسره کوي، تر څو د ښاري پرمختګ اصول خوندي او د ناقانونه ودانیو مخه ونیول شي.
