د لغمان ولايت د ولايتي شورا ودانۍ ورغول شوه
ښار جوړولو او ځمکو وزارت د ثبات تحکيم برنامې له لارې د لغمان ولايت د ولايتي شورا ودانۍ جوړولو چارې بشپړې کړې او ګټې اخېستنې ته يې وسپارله.
دا ودانۍ په ۳۳۰ متر مربع ځمکه کې په دوه پوړيز ډول د دولت له انکشافي بوديجې څخه په ۱۵ ميلیونه افغانۍ ورغول شوه چې د نورو اړينو خونو تر څنګ ۸ کاري خونې هم لري.
ښار جوړولو او ځمکو وزارت د ثبات تحکيم برنامې له پيل راهېسې تر اوسه د هېواد په ګڼو ولايتونو کې ۱۲۹ بېلابېلې دولتي ودانۍ رغولي او په دې سره يې د دولتي ادارو د ظرفيت په لوړولو کې اغېزناکه ونډه اخېستې ده.
