د قره باغ ولسوالۍ ښاري تخلفات تر څار لاندې ونیول شول
۱۴۴۷/۱/۷
د کور او ښار جوړولو وزارت، له ښاري تخلفاتو د مخنیوي ریاست تخنیکي ټیم د کابل ولایت د قره باغ ولسوالۍ ښاري وضعیت وڅاره او د بېنظمۍ موارد یې و ارزول.
د یاد ریاست رئیس، مولوي عبدالمنان حقاني، د څارنې موخه د ښاري نظم تأمین، د خپلسرو ودانیو مخنیوی او د ښار جوړولو د اصولو پلي کول وبلل.
ښاغلي مولوي حقاني وویل، په یادې ارزونه کې ګڼ شمېر خپلسرې ودانۍ، د ښار جوړولو له اصولو سرغړونې، او د عامه شتمنیو غصب ثبت شوی، چې له قانوني اصولو سره په ټکر کې دي.
نوموړی وایي، په سوداګریزو سیمو کې د استوګنې لپاره جوړې شوې ودانۍ، هدیرې، او شنې ساحې هم د خلکو له خوا غصب شوې دي، چې دا کار د ښاري نظم جدي نقض ګڼل کېږي.
هغه وایي، د تخنیکي ټیم غړو یې د قره باغ له محترم ولسوال او ښاروال سره کتلي او د یادو مواردو په تړاو یې خبرې کړې دي.
همداراز، متخلفینو ته د عامه پوهاوي پیغامونه ورکړل شول، څو د قانون مراعت ته ژمن پاتې شي.
د کور او ښار جوړولو وزارت یو ځل بیا ټینګار کوي، چې د ښاري تخلفاتو پر وړاندې به له قانوني میکانیزمونو څخه په ګټې اخیستلو، جدي اقدامات ترسره کړي او د ښاري نظم د خوندي کولو لپاره به اړوند ارګانونه لا زیات همغږي کړي.
