د غور ولایت په فیروزکوه ولسوالۍ کې د تیغ زلزله اړوند توپوګرافي سروی پیل شوه
۱۴۴۷/۶/۱۲
د کور او ښار جوړولو وزارت، د سروې او جي ای ایس ریاست محترم رئیس حافظ انجنیر محمد یوسف لطیف وایي، د ریاست اړوند تخنیکي ټیم یې د غور ولایت په فیروزکوه ولسوالۍ کې د تیغ زلزله په سیمه کې د توپوګرافي سروې لړۍ پيل کړې ده.
ښاغلي حافظ لطیف وویل، یاده سروې د شاوخوا 706,3 جریبه ځمکې په مساحت ترسره کېږي، چې موخه یې د مهاجرینو د استوګنې لپاره د یو منظم، معیاري او خوندي ښارګوټي د جوړولو تخنیکي اړتیاوې تشخیصول دي.
نوموړي زیاته کړه، تخنیکي ټیمونه د ځمکې کچه، توپوګرافي، د تأسیساتو ممکنه لارې، د طبیعي ګواښونو وضعیت او د ښار د مناسبې نقشې د جوړولو لپاره اړینې هندسي او تخنیکي محاسبات کوي.
د کور او ښار جوړولو وزارت د سروې او جي ای ایس ریاست د رئیس په خبره، د یادې پروژې بشپړ تخنیکي سروې به د دې بنسټیزه طرحه چمتو کړي چې له مخې به یې د مهاجرینو لپاره یو نوی ښارګوټی د معیاري سرپناه، بنسټیزو اسانتیاوو او ښاري خدمتونو پر بنسټ طرحه او تطبیق شي.
په هېواد کې د بې کوره کورنیو لپاره د ښارګوټو جوړول د کور او ښار جوړولو وزارت له مهمو برنامهيي لومړیتوبونو څخه دي، چې دا ډول پروژې به د اړتیاوو په کچه او لوړ کیفیت سره وړاندې شي.
د سروې تر بشپړېدو وروسته به د ښارګوټي بشپړ پلان، د تأسیساتو نقشه او د پلي کولو پړاوونه ترتیب شي، څو په سیمه کې د خلکو لپاره د استوګنې نوی او مناسب ځای رامنځته شي.
