د غزني ولایت ستراتیژیک پلان بیا کتنه وشوه
۱۴۴۶/۷/۱۳
د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني په مشرۍ د ښاري نقشو د ویزه کولو کمېسیون ناسته وکړه.
په دغه ناسته کې، د ملي جامع پلان ریاست استازو د غزني ولایت ستراتیژیک پلان تشریح کړ، ګټې، شته ستونزې او حل یې په ګوته کړ او ډاډ یې ورکړ چې د تطبیق لپاره چمتو دی.
دوی زیاته کړه، په غزني ولایت کې یې د ټولو اړوندو ادارو او عامو خلکو نظرونه اخیستي او تر هغې وروسته یې په ستراتېژیک پلان کې اصلاحات راوستي دي.
دغه راز، په تېر پلان کې صنعتي، استوګنیزې، روغتیایي، مذهبي، ښوونیزې، لوبغالي، تفریحي او شنې ساحې موجودې وې چې، په اصلاح شوي پلان کې یادې سیمې نورې هم پراخه شوي دي.
دا پلان د پنځلس (۱۵) کالونو لپاره ترتیب شوی چې، د چاپېریال ساتنې او نفوسو خوندیتوب ټول مطالعات او څېړنې په کې په پام کې نیول شوي دي.
ترڅنګ یې، په دې پلان کې حلقوي سړکونه، هوایي ډګر، ترانسپورتي ترمینلونه او نور ښاري اړین موضوعات په پام کې نیول شوي دي.
د کور او ښار جوړولو وزارت د ښاري چارو محترم مرستیال وویل، غزني ولایت تاریخي او ترانزیټي اهمیت لري، باید ټولې اړتیاوې یې په پام کې ونیول شي او په خبره یې د لا زیاتو اسانتیاوو رامنځته کولو په موخه دې یو ځل بیا مطالعه شي او له هغې وروسته دې د تائیدۍ لپاره وړاندې شي.
