د غزني ولایت د ارزاقو عمومی مدیریت د امارتي تجارتي مارکیټ له ودانیزو چارو څارنه وشوه
۱۴۴۷/۰۴/۱۶
د غزني ولایت د کور او ښار جوړولو ریاست محترم رئیس مولوي نور ولي بلال متقي وایي، د دې ریاست اړوند تخنیکي ټیم یي د ارزاقو عمومی مدیریت اړوند د امارتي تجارتي مارکیټ د کارونو له جریان څخه کتنه وکړه، یاده پروژه د خصوصي سکتور له لوري په ټولیز ډول د ۷۴ میلیونه افغانیو په مالي لګښت جوړیږي او پنځه جاینټونه لري.
ښاغلي مولوي متقي وویل، د څلورو برخو د تهداب کانکریټ اچونې چارې بشپړې شوې دي، د پنځمې برخې د سیم تاوي کارونه پای ته رسېدلي او د کانکریټ اچونې چارې یې لا پاتې دي.
همدارنګه، د لومړۍ او دوهمې برخې د رینګ سیم تاوي کارونه روان دي. د تخنیکي ټیم له خوا قراردادي شرکت ته د سیم تاوي د چارو په برخه کې د نقشې مطابق لازمې لارښوونې وشوې ترڅو کارونه په تخنیکي معیارونو برابر دوام ومومي.
د غزني ولایت د کور او ښار جوړولو ریاست د ښار د ودانیزو چارو د سمون، پرمختګ او معیاريتوب لپاره په دوامداره توګه د بېلابېلو پروژو له تطبیق څخه څارنه کوي.
