د عامه او خصوصي مشارکت ریاست د انتقال په اړه هوکړه لیک د ښار جوړولو او ځمکو وزارت او د پانګونې د اسانتیا واحد ترمنځ لاسلیک شو
په هغه غونډه کې چې په همدې مناسبت د ښار جوړولو او ځمکو په وزارت کې ترسره شوه، د ښار جوړولو او ځمکو وزارت سرپرست وزیر محترم محمود کرزی د پانګونې د اسانتیا واحد له رئیس ښاغلی عطاء الله نصیب او د دې ادارې له مرستیال ښاغلی فهد داود مومند سره وکتل او د عامه او خصوصي ریاست د انتقال په اړه هوکړه لیک لاسلیک کړ.
دا هوکړه لیک، د دواړو ادارو ترمنځ د همغږۍ د کچې د پیاوړتیا، د عامه او خصوصي چارو د ښه تنظیم او د پانګونې د جذب لپاره د اړینو فرصتونو برابرولو په موخه لاسلیک شو.
د دې هوکړه لیک پر اساس، ښار جوړولو او ځمکو وزارت به د عامه او خصوصي مشارکت ریاست د واک او دندو د سپارلو، د پروژو په تطبیق کې د ګډ کار، د ځمکې د سروې او تصفیې او همدارنګه د انکشافي پلانونو د ډیزاین او طرحو د جوړولو په برخه کې له یادې ادارې سره همکاري کوي.
همدارنګه، د پانګونې د اسانتیا واحد به د دې هوکړه لیک پر اساس د عامه او خصوصي ریاست د چارو د ښه تنظیم، خصوصي سکټور سره د همغږۍ د کچې د پیاوړتیا او د پانګونې د جذب په برخه کې خپل کاري مسوولیتونه پر مخ وړي.
دا هوکړه لیک د جمهوري ریاست د عالي مقام د ۱/۲/۱۳۹۹ کال د (۱۸۰) شمېرې حکم پر اساس ښار جوړولو او ځمکو وزارت له لوري د عامه او خصوصي مشارکت ریاست انتقال د پانګونې د اسانتیا واحد په موخه ترتیب شوی دی.
###
