د صنعتي پارکونو لپاره د ځمکې د انتقال د بدیل په اړه خبرې وشوې
۱۴۴۷/۰۴/۲۹
د کور او ښار جوړولو وزارت د ښاري چارو د محترم مرستیال شیخ مدارعلي کریمي بامیاني په مشرۍ، د صنعت او سوداګرۍ وزارت استازو، صنعتي پارکونو رئیس، د کابل ښاروالۍ استازی، د ځمکو، اوبو او برېښنا ادارې استازي او د کور او ښار جوړولو وزارت انجینرانو ناسته ترسره کړه.
په دې ناسته کې لومړی د صنعت او سوداګرۍ وزارت اړوند د صنعتي پارکونو رئیس د صنعتي پارکونو او د ۷۰۰ جریبه ځمکې د انتقال په اړه معلومات وړاندې کړل او د صنعتي پارکونو لپاره د ځمکې غوښتنه یې وکړه. همهاله، ګډونوالو خپلې نظریې او وړاندیزونه د یادې موضوع په اړه شریک کړل.
وروسته د ښاري چارو محترم مرستیال شیخ مدارعلي کریمي بامیاني په هېواد کې د صنعت د ودې او پراختیا لپاره د سوداګرو او پانګوالو لپاره زمینه برابرول مهم وبلل او ټینګار یې وکړ چې د عاليقدر امیرالمؤمنین (حفظه الله) حکم باید د صنعتي کارکوونکو او پانګووالو لپاره په کابل ښار کې عملي شي.
په پای کې پرېکړه وشوه، چې د کور او ښار جوړولو وزارت د جامع ملي پلان رئیس محترم انجنیر رحمت الله قدیري په مشرۍ هیئت چې د اراضۍ استازی، د کابل ښاروالۍ، اوبو او برېښنا ادارې او د سوداګرۍ وزارت استازي پکې شامل وي، د پلچرخي صنعتي پارک د ۷۰۰ جریبه ځمکې ساحه له نږدې اوګوري او خپل راپور د موضوع د څرنګوالي په اړه وړاندې کړي.
همدارنګه د اراضۍ استازی موظف شو چې د کابل ښار د سپینو ځمکو اړوند لیست د ۷۰۰ جریبه صنعتي پارک د بدیل جوړولو لپاره په راتلونکې ناسته کې شریک کړي.
دا اقدام د هېواد د اقتصادي ودې، پانګوالو ته د اسانتیاوو برابرولو، او د صنعتي پارکونو د پراختیا لپاره د پلان جوړلو یوه مهمه برخه ګڼل کېږي، ترڅو په کابل ښار کې د صنعتي او سوداګریزو فعالیتونو لپاره معیاري او قانوني ځمکې چمتو شي.
