د سرپل ولایت د تعلیمي بنسټونو د ترمیم او ښاروالۍ د مارکېټ له ودانیزوچارو څارنه وشوه
۱۴۴۷/۰۴/۲۷
د سرپل ولایت د کور او ښار جوړولو ریاست تخنیکي ټیم د ولایت د کمیټې په ملتیا د څلورو تعلیمي ودانیو د ترمیم او د ښاروالۍ د مارکېټ د بنسټونو د کانکریټ اچونې چارې وڅارلې، څو د کارونو کیفیت او شفافیت ډاډمن شي.
د سرپل ولایت د کور او ښار جوړولو ریاست محترم رئیس ملا محمد نور نوراني وویل، د دې ریاست اړوند تخنیکي ټیم د ولایت مقام د موظفې کمېټې په همکارۍ د څلورو تعلیمي بنسټونو د ترمیم او د ښاروالۍ د مارکېټ د بنسټونو د کانکریټ اچونې له چارو څخه لیدنه او څارنه ترسره کړه.
د نوموړي په خبره، په دې څارنه کې د امام یحیی ابن زید هلکانو لیسه، د شهید محمد امین هلکانو لیسه (د سوزمه قلعه ولسوالۍ اړوند)، د امهاتالمؤمنین د نجونو مدرسه (د تعلیمات اسلامي اړوند)، او د معارف ریاست د مرکزي ودانۍ شاوخوا د کانکریټ اچونې ساحه شامله وه.
د ملا محمد نور نوراني په وینا، د دې څارنې موخه د ترمیمي چارو شفافیت، د تعلیمي ودانیو د کیفیت ساتنه او د انجینري معیارونو د رعایت ډاډ ترلاسه کول دي. نوموړي زیاته کړه، چې اړوند قراردادي شرکت ته د کار د لا ښه کیفیت لپاره لازمې تخنیکي لارښوونې هم ورکړل شوې.
