د جوزجان ښار د سړکونو کانکریټ اچونې له چارو څارنه وشوه
۱۴۴۷/۰۵/۲۸
د جوزجان ولایت د کور او ښار جوړولو ریاست محترم رئیس، الحاج ملا عبدالله فیضان، وویل چې د یاد ریاست تخنیکي او نظارتي ټیم د جوزجان ښار د سړکونو د کانکریټ اچونې له چارو څارنه وکړه.
ښاغلي ملا فیضان وویل، د تخنیکي ټیم له لوري د جن محله د لومړۍ برخې سړک او د مدرسه کلان ابو سلیمان جوزجاني د دوهم سړک د کانکریټ اچونې چارې له نږدې وڅېړل شوې. په دغو پروژو کې د ویالو کندنکاري، جغل اچونه او د شفته ویالو کانکریټ اچونې کارونه تر نظارت لاندې ترسره شول.
د نوموړي په خبره، د قراردادۍ شرکت مسؤلینو ته لارښوونه وشوه، چې ټولې چارې دې د نقشې، براورد، تدارکاتي شرطنامې او د انجنیري نورمونو له مخې تطبیق کړي. همدارنګه، د پروژې د لا اغېزمنتیا او کیفیت د لوړولو لپاره د موظف انجنیر له لوري یو لړ تخنیکي وړاندیزونه وړاندې شول.
د کور او ښار جوړولو وزارت د هېواد په بېلابېلو ولایتونو کې د ښاري سړکونو، اوبو لګولو سیستمونو او بنسټیزو ښاري پروژو د تطبیق ترڅنګ د هغو د منظم څارنې او کیفیت د تضمین پروګرامونه پرمخ وړي.
