د جوزجان ولایت د زرو فامیلو سړک د جوړولو له چارو څخه نظارت وشو
۱۴۴۷/۰۷/۱۰
د جوزجان ولایت د کور او ښار جوړولو ریاست د شبرغان ښاروالۍ اړوند د زرو فامیلو د سړک د جوړولو له روانو چارو څخه څارنه وکړه.
په یاد نظارت کې د جوزجان ولایت کور او ښار جوړولو ریاست محترم رئیس د اړوند تخنیکي ټيم سره حضور درلود او د پروژې د تطبیق بهیر یې له نږدې وڅېړه.
د نظارت پر مهال د ویالو کیندنه، د ویالو سیخ بندي، د شفتې کانکریټ اچونه او د سړک لنگرکاري د انجنیري معیارونو له مخې تر ارزونې لاندې ونیول شوه.
محترم رئیس د ساختماني شرکت مسوولینو ته لارښوونه وکړه چې د زرو فامیلو د سړک ټولې چارې د منظور شوې نقشې، د کاري حجم د براورد، تدارکاتي شرطنامې او د انجنیري او مهندسي نورمونو سره سم، په چټک او معیاري ډول پر مخ یوسي او د پروژې د عملي تطبیق ډاډ ورکړي.
همدارنګه، د پروژې د لا ښه والي او اغېزمنتیا په موخه د نظارتي انجنیر له لوري یو لړ تخنیکي نظریات او سپارښتنې هم وړاندې شوې.
