د تقنیني اسنادو د فقهې ارزونې کمېټې لومړنۍ غونډه وشوه
۱۴۴۷/۱/۵
د کور او ښار جوړولو وزارت د تقنیني اسنادو د فقهې ارزونې لپاره ځانګړې کمیټه جوړه کړه، چې خپله لومړنۍ غونډه یې د یاد وزارت د دعوت او ارشاد ریاست په تالار کې ترسره کړه.
د دې کیمټې مشر مولوي عبدالباري خدام وویل، په دې غونډه کې د پشتني بانک له لوري د اسلامي بانکدارۍ له اصولو سره سم، د ساختماني پروژو د تمویل یوه نوې طرحه وړاندې شوه چې د غونډې ګډونوالو خپل نظرونه شریک کړل.
د مولوي خدام په خبره، په دغه طرحه کې څلور مهم مالي میکانیزمونه شامل وو، چې متناقصه شراکت، استصناع، مرابحه او اجاره منتهی بالتملیک، بلل کېږي.
د غونډې برخه والو دیني علماوو پرېکړه وکړه، چې یاد مالي میکانیزمونه به د حنفي فقهې له اصیلو او باوري فقهي سرچینو څخه فقهې تحلیل ته وړاندې شي.
د موضوعاتو فقهې ارزونه مشخصو علماوو ته وسپارل شوه، تر څو هغوی د راتلونکې غونډې تر جوړېدو مخکې خپلې څېړنې بشپړې او د کمېټې سکرتریت ته وسپاري .
اوسمهال یاد تمویلي اسناد د فقهې له نظره تر ژور تحلیل او ارزونې لاندې دي، چې د ارزونې پایلې به له بشپړېدو وروسته له اړوندو بنسټونو سره شریکې شي.
د یادولو وړ ده، چې دا کمېټه د اسلامي اصولو پر بنسټ د کور او ښار جوړولو سکتور د حقوقي او مالي اسنادو فقهې تطابق یقیني کوي، ترڅو پرمختیایي پروژې هم له شرعي اصولو سره سمې وي او هم له حقوقي پلوه اعتبار ولري.
