د تقنیني اسنادو د بیا کتنې کمېټې ناسته؛ د طرزالعملونو د عملي کېدو پر قانوني تطبیق ټینګار وشو
۱۴۴۷/۰۴/۱۴
د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني په مشرۍ، د تقنیني اسنادو د بیا کتنې او طی مراحلو کمېټې غونډه ترسره شوه.
په دې ناسته کې د وزارت د پلان او پالیسۍ ریاست استازي د ښار جوړولو د قانون د مسودې، د عالیقدرامیرالمؤمنین (حفظه الله تعالی) د حکم پر بنسټ د ګلبهار سنټر د اپارتمانونو د کرایه ورکولو طرزالعمل، او همدارنګه د نظارت او تعقیب احکامو او فرمانونو عمومي ریاست د استعلامونو په اړه معلومات وړاندې کړل. نوموړي څرګنده کړه چې هغه اختلافات چې د کور او ښار جوړولو وزارت او د کابل ښاروالۍ ترمنځ موجود وو، حل شوي دي.
ور پسې د کور او ښارجوړولو وزارت د ښآري چارو محترم مرستیال شیخ مدار علي کریمي بامیاني د ټولو طرزالعملونو د عملي کېدو پر قانوني بنسټ ټینګار وکړ او ویې ویل د ادارو او کارونو بنسټ د قانون پر تطبیق ولاړ دی.
نوموړي زیاته کړه چې باید په ټولو برخو کې د ظرفیت لوړونې او کارکوونکو د هڅونې لپاره جدي هڅې وشي، تر څو ټول مامورین د مسؤلیت او هڅې له روحیې سره خپلې دندې ترسره کړي او په ځانګړي ډول د ښاري چارو په برخه کې خلکو ته لا زیاتې اسانتیاوې برابرې شي.
د بحثونو او نظریو له تبادلې وروسته پرېکړه وشوه چې د ښار جوړولو د قانون د نهایي کېدو، د ګلبهار سنټر د اپارتمانونو د کرایه ورکولو طرزالعمل، او د نظارت او تعقیب احکامو او فرمانونو د عمومي ریاست د استعلامونو په اړه موضوعات دې له وړاندې کولو وروسته د وزارت مقام ته وړاندې شي، څو لازم تصمیم ونیول شي.
