د باثباته اقتصادي او په خپلو پښو ولاړ افغانستان لپاره کار روان دی
۱۴۴۶/۱۱/۰۲
د کور او ښار جوړولو وزارت محترم سرپرست وزیر الحاج شیخ حمدالله نعماني، په فاریاب ولایت کې د دغه ولایت اړوند له یو شمېر علماؤ او قومي مشرانو سره وکتل.
ښاغلي شیخ حمدالله نعماني وویل، موجوده نظام د امارت د مجاهدینو او د ولس په بې درېغه او هر اړخیزو قربانیو راغلی، چې د لا زیاتې پیاوړتیا په موخه یې د ولس او امارت ترمنځ ګډې همغږۍ او همکارۍ ته اړتیا ده.
نوموړي وویل، اشغال ختم، خپلواکي او سوله راغله، د باثباته اقتصادي او په خپلو پښو ولاړ افغانستان لپاره کار روان دی او که خلک شکر وباسي، الله انعامات نور هم زیات کړي.
محترم سرپرست وزیر وویل، افغانستان د سیال کېدو په درشل کې دی او د هر ولایت علماء او قومي مشران دې د ټولنې د اصلاح او د ځوان قشر په سالمه روزنه کې خپل مسؤلیت اداء کړي.
هغه وویل، د پرمختللي افغانستان لپاره د ټولو مسؤلیت ګرځي، چې د عدالت د ټینګښت لپاره کار وکړي، اسلامي ارزښتونه بیان شي، د ټولنې اخلاق سم او ناوړه دودونه ختم شي.
ښاغلي نعماني زیاته کړه، استدلال او منطق باید وکارول شي، دین ته د خلکو پاملرنه زیاته شي، چې په خبره یې که پوهه زیاته شي د جرایمو کچه راکمېږي.
په اخر کې د فاریاب ولایت اړوند راغلو علماء کرامو خوښي څرګنده کړه او خپل مسؤلیت یې وباله چې د ټولنې د اصلاح لپاره به کار کوي، د اسلامي امارت ملاتړ ته به لا زیات کار کوي او اطاعت به کوي.
