د اټومي انرژۍ ادارې د جوړېدونکې ودانۍ د ستونزو د حل په موخه غونډه وشوه
۱۴۴۷/۰۳/۱۰
د کور او ښار جوړولو وزارت د محترم مالي او اداري مرستیال الحاج محمد ارسلاح خروټي په مشرۍ او د اړوندو ریاستونو په ګډون، د اټومي انرژۍ ادارې د ودانۍ د ستونزو د حل لپاره غونډه ترسره شوه.
په دې غونډه کې، د مهندسۍ او ودانیو د ډیزاین ریاست، د برنامو د چارو د انسجام ریاست، د نظارت ریاست او د مالي ریاست مسؤلینو ګډون درلود، چې هر یو د ودانۍ د نقشو او د ترسره شوو کارونو په اړه خپل نظرونه وړاندې کړل.
د کور او ښار جوړولو وزارت محترم مالي او اداري مرستیال الحاج محمد ارسلاح خروټي وویل، اړوند ریاستونه دې د ودانۍ نقشې په تخنیکي ډول وڅېړي او د تطبیق بهیر سره دې ورته والي ورکړي، څو یې له مخې تصمیم ونیول شي.
ښاغلي مرستیال غوښتنه وکړه چې اړوند ریاستونه دې راټول شوي معلومات په راتلونکې ناسته کې بیان کړي.
د کور او ښار جوړولو وزارت د دولتي ادارو د غوښتنو پر اساس ودانیزې نقشې طرحه او ډیزاین کوي او د تطبیق لپاره یې اړوندو مراجعو ته سپاري، څو پروژې د انجینري معیارونو مطابق پر مخ ولاړې شي.
