د "امید سبز" ښارګوټي کې یو شمېر ښاري تخلفات په نښه شول
۱۴۴۷/۳/۲۹
د کور او ښار جوړولو وزارت د ټول هېواد په کچه له ښاري تخلفاتوړ د مخنیوي برخه کې جدي څارنې او ارزونې پیل کړي دي، چې سالمې ښاري پراختیا ته ژمنتیا څرګندوي.
د دغه وزارت اړوند، له ښاري تخلفاتو د مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي ټیم یې د کابل په امید سبز ښارګوټي کې د ښاري نظم، منظمې پراختیا او د خلکو د هوساینې په موخه، خپلو تخنیکي او څارنیزو فعالیتونو ته دوام ورکړ، چې په پایله کې یې ځینې موارد په نښه شول.
ښاغلی مولوي حقاني وایي، دغه څارنه او ارزونه، د منظور شوي تفصیلي پلان پر بنسټ، په دقیق، مسلکي او شفاف ډول ترسره شوه، ترڅو د ښاري اصولو خلاف کړنې وپېژندل شي او د حل لپاره یې لازم اقدامات تر سره شي.
نوموړی وایي، د سوداګریزو ساحو په مختلطو (سوداګریز او استوګنیز) بدلول، په استوګنیزو ساحو کې د ګدامونو جوړول، کم منزله ساحو کې د لوړو منزولو جوړول، په ساتوګنیزو ساحو کې د تولیدي فابریکو جوړولو او داسې نور هغه موارد په نښه شول، چې ښاري سرغړونې بلل کېږي.
تمه ده ، چې د یادې څېړنې بشپړ او هر اړخیز راپور به ډېر ژر د اړوندو ادارو سره شریک شي، څو د لازمو کړنو لپاره اړین ګامونه پورته شي.
د کور او ښار جوړولو وزارت د سالمې ښاري پراختیا، قانوني جوړښت او د خلکو د ژوند د کیفیت د لوړولو لپاره، له هېڅ ډول هڅې دریغ نه کوي.
