د الشفا روغتون د موټرو د تمځای ودانیزې چارې و څارل شوې
۱۴۴۷/۶/۲۴
د کور او ښار جوړولو وزارت د ښاري سرغړونو د مخنیوي عمومي ریاست د لارښوونې په اساس، د بنسټیزو پروژو د نظارت ریاست تخنیکي ټیم د ودانیزو او بنسټیزو پروژو د څارنې او تطبیق د ریاست په همغږۍ سره د الشفا روغتون د موټرو د تمځای د ودانیزو چار له بهیر څخه کتنه کړې ده.
د بنسټیزو پروژو د نظارت ریاست محترم رئیس وایي، د ساحوي لیدنې پر مهال څرګنده شوې چې د پروژې د یادې برخې د پرمختګ په موخه د شیروالونو او پایو کانکریټي کار تر سره شوی او کار د تخنیکي معیارونو سره سم روان دی.
د نوموړي په خبره، تخنیکي ټیم د څارنې پر مهال د کار د کیفیّت د خوندیتوب، د ساختماني اصولو د دقیق رعایت او د پروژې د منظم دوام په اړه لازمې سپارښتنې هم وړاندې کړې دي.
د الشفا روغتون د موټرو د تمځای پروژه د وزارت اړوندو تخنیکي څانګو د همغږۍ له مخې د ملي انکشافي خدمتونو د پیاوړتیا په موخه عملي کېږي.
