د اغا خان بنسټ په کابل کې له بهرنیو هېوادونو څخه د بیرته راستنېدونکو کورنیو لپاره سرپناه جوړوي
۱۴۴۴/۰۴/۲۱
له ګاونډیو هېوادونو (ایران او پاکستان) څخه د بېرته راستنېدونکو کورنیو او په پغمان ولسوالۍ کې د بې ځایه شویو کورنیو لپاره په کابل کې سرپناه جوړیږي.
د اغاخان خیریه بنسټ استازو د کور او ښار جوړولو وزارت له محترم سرپرست وزیر مولوي حمدالله نعماني سره په ناسته کې له ګاونډيو هېوادونو ایران او پاکستان څخه د بیرته راستنېدونکو او په پغمان ولسوالۍ کې د بېلا بېلو ولایتونو څخه د راکډه شویو کورنیو لپاره سرپناه جوړوي او په همدې اړه یې هر اړخیزې خبرې وکړې.
د اغا خان خیریه بنسټ مسؤلینو وویل، هغه کورونه چې نسبتاً ویجاړ شوي او یا هم په بشپړه توګه ویجاړ شوي، دوی یې بیرته رغوي.
دغه راز هغه کورنۍ چې ځمکه لري او کور نه لري او نه هم د کور جوړولو وس لري، د هغوی لپاره به هم د هغوی په خپلو ځمکو کې په (۳۰) متر مربع ځای کې د محلي موادو څخه د سیمې د اوسیدونکو په مرسته کور جوړوي.
د کور او ښار جوړولو وزارت محترم سرپرست وزیر مولوي حمدالله نعماني له اغاخان بنسټ مننه وکړه، چې د بېرته راستنېدونکو او داخلي کډوالو بې وزله کورنیو ته سرپناه برابروي.
نوموړي زیاته کړه، چې د سرپناه جوړولو په برخه کې دې د خلکو اساسي ستونزو ته پاملرنه وشي.
