د ارزان بیه کورونو د جوړولو پر طرحه خبرې وشوې
۱۴۴۴/۱/۱۶
د ښار جوړولو او ځمکو محترم چارسمبالی وزیر مولوي حمدالله نعماني د پوهنتون د یو شمیر استادانو سره وکتل او پر دې یې بحث وکړ چې څنګه کېدای شي په کم لګښت مناسب کورونه جوړ شي.
په یاده ناسته کې د پوهنتون استاد محترم کاظمي د خپله جوړه کړې طرحه د ښار جوړولو او ځمکو چارسمبالي وزیر ته وړاندې کړه او وې ویل، کولی شي په چټکۍ او کم لګښت سره داسې کورونه جوړ کړي چې غوره کیفیت او لوړ مقاومت ولري.
دغه راز په یاده ناسته کې پر دې بحث وشو چې څنګه کېدای شي د خلکو اقتصادي، ټولنیز وضعیت او فرهنګي ژوند ته په کتو سر پناه جوړه شي.
د ښار جوړولو او ځمکو وزارت محترم چارسمبالي وزیر مولوي حمدالله نعماني وویل، د ټولو هغو طرحو او برنامو ملاتړ کوي، چې بې سرپناه هېوادوالو ته مناسبه سر پناه برابروي.
نوموړي زیاته کړه، چې یوه کمېټه دې جوړه شي تر څو د خلکو اقتصادي وضعیت ته په کتو د مسکن په برخه کې بېلا بېلې طرحې جوړې کړي، چې په افغانستان کې د بې سرپناهۍ ستونزه حل شي.
