د «الشیخ» ښارګوټي د نمرو د وېش په اړه راپور وړاندې شو؛ پر شفافیت او هر اړخیزې ارزونې یې ټینګار وشو
۱۴۴۷/۹/۵
د کور او ښار جوړولو وزارت، د محترم مالي او اداري مرستیال مولوي محمد رباني ناصح په مشرۍ او د ټاکل شوې کمېټې د غړو په حضور کې، د نوي کابل ښار اړوند د «الشیخ» ښارګوټي د نمرو د وېش په اړه ځانګړې غونډه ترسره شوه.
په دې ناسته کې د کمېټې غړو د نمرو د وېش د بهیر په تړاو خپل راپور په لیکلي او شفاهي بڼه وړاندې کړ او د بېلابېلو پړاوونو اړوند معلومات یې شریک کړل.
د کور او ښار جوړولو وزارت محترم مالي او اداري مرستیال مولوي محمد رباني ناصح د راپور تر اورېدو وروسته زیاته کړه، په ځینو برخو کې لا هم اړتیا ده چې وضاحت ورکړل شي، چې په خبره یې لا هم د نمرو د وېش په بهیر کې ځینې ستونزې موجودې دي.
نوموړي وویل، د پخوا وېشل شوو ځینو نمرو په اړه بشپړ او روښانه معلومات نه دي وړاندې شوي، چې باید په څرګند ډول تشریح او تثبیت شي او په تړاو یې غوڅ دریځ ونیول شي.
ښاغلي مالي او اداري مرستیال ټینګار وکړ، چې د نمرو د هر پړاو او فاز وېش باید له ټولو جزیاتو، دقیق تحلیل او هر اړخیزې ارزونې سره په واضح او روښانه ډول ترتیب شي، څو په راتلونکي کې بشپړه شفافیت تضمین او هر ډول ابهام له منځه ولاړ شي.
محترم مولوي محمد رباني ناصح له لوري، یو ځل بیا پر شفافیت او د موضوع پر وروستي کولو ټینګار وشو او د کمېټې غړو ته دنده وسپارل شوه، چې د وېش ټول ډولونه په مشخص ډول تفکیک او وڅېړي.
دغه راز، لارښوونه وشوه چې که د نمرو وېش له هوکړه لیک خلاف ترسره شوی وي، نو اړوند جزیات دې په دقیقه توګه مستند او ترتیب شي، څو په راتلونکي کې لازم تصمیم ونیول شي.
