دایکندي کې د دوه پراختیايي پروژو رغنیزې چارې له ۹۰ سلنې واوښتې
ښارجوړولو او ځمکو وزارت د دایکندي ولایت د ښارجوړولو ریاست او د دې ولایت د ګیتي ولسوالۍ اداري ودانۍ رغنیزې چارې تر کار لاندې لري او په نیږدې راتلوونکې کې به ګټې اخیستنې ته وسپارل شي.
د دایکندي دښارجوړولو ریاست په ۲۱۸ متر مربع ځمکه کې په دوه پوړونو چې یو کنفرانس خونه، ۱۱ کاري دفترونه، دوه پخلنځي او ۷ عصري تشنابونه لري د ۱۲ میلیونه او ۶۰۰ زره افغانیو په ارزښت جوړیږي، د دې ودانۍ رغنیزې چارې ۹۲ سلنه پرمخ تللي دي. همداراز د دې ولایت د ګیتي ولسوالۍ اداري کمپلکس په ۴۹۰ متر مربع ځمکه کې په درې پوړونو چې ۱۷ کاري دفترونه، یو کنفرانس خونه، یو پخلنځی، یو ګدام او ۹ عصري تشناب لري د ۲۳ میلیونه افغانیو په ارزښت جوړیږي، د دې ودانۍ رغنیزې چارې ۹۵ سلنه بشپړې شوې دي.
ښارجوړولو او ځمکو وزارت د بنسټیزو پروژو په تطبیق او د ټولګټو پروژو په عملي کولو سره؛ د هېواد په کچه سیمه اییزه حکومتولي پیاوړې کړې او د کاري فرصتونو په رامنځته کولو؛ خلکو ته اساسي خدمات وړاندې کوي.
###
