دایکندي کې د دوه ټولګټو پروژو رغنیزې چارې د بشپړېدو په حال کې دي
ښارجوړولو او ځمکو وزارت د دایکندي ولایت مقام مېلمستون ودانۍ رغنیزې چارې ۸۵ سلنه او د دې ولایت په شهرستان ولسوالۍ کې د شهرستان ښوونځي رغنیزې چارې ۷۵ سلنه بشپړې کړي دي.
د دایکندي د ولایت مقام مېلمستون په ۳۳۶ متر مربع ځمکه کې په دوه پوړونو د ۱۶ میلیونه او ۵۰۰ زره افغانیو په ارزښت او د شهرستان ښوونځی په ۴۲۰ متر مربع ځمکه کې په دوه پوړونو د ۲۶ میلیونه افغانیو په ارزښت د ښارجوړولو او ځمکو وزارت له پراختیايي بودیجې جوړیږي.
د ویلو ده چې د هېواد په کچه د ښوونځیو جوړول د ښارجوړولو او ځمکو وزارت کار لومړیتوب دی او دا وزارت په پام کې لري د خصوصي سکټور په همکارۍ د ولایاتو په کچه د ښوونځیو جوړولو لړۍ لا ګړندۍ کړي.
###
