بامیانو کې د زرګرانو سیمې لپاره د بهسازۍ پر پلان خبرې وشوې
۱۴۴۵/۱۲/۱۹
د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني په خپل کاري دفتر کې د بامیان ولایت د کور او ښار جوړولو له محترم رئیس انجنیر امان الله امان او د دغه ولایت له محترم ښاروال مولوي روزي محمد افکار سره وکتل.
په دغه ناسته کې، په بامیان ولایت کې د زرګرانو د سیمې لپاره د بهسازۍ پر پلان خبرې وکړې.
تر هر اړخیزو خبرو او بحثونو وروسته تصمیم ونیول شو، چې د کور او ښار جوړولو وزارت به د فلورانس پوهنتون له لوري جوړ شوی لومړنی پلان تر څېړنې لاندې ونیسي، خپل وړاندیزونه او تجربط به ورسره شریکې کړي او د یو چهارچوب په شکل کې به یې ترتیب کړي.
ښاغلي شیخ مدار علي کریمي بامیاني د بامیان محترم ښاروال ته وویل، د ځمکې د حقوقي هویت برخلیک معلومول د تقاضا او فرمایش ورکوونکو ادارو اړوند کېږي چې باید د بامیان ښاروالۍ یې په اړه لاس په کار شي.
دغه راز، نوموړي د کور او ښار جوړولو وزارت اړوندو ریاستونو ته دنده وسپارله چې د بهسازۍ پلان لپاره لاس په کار شي.
د ایټالیا هېواد د فلورانس پوهنتون په پام کې لري چې د بامیان په ولایت کې مغارو کې د اوسېدونکو کورنیو لپاره سل کورونه او دغه راز د زرګرانو د سیمې لپاره د بهسازۍ پلان جوړ او پلي کړي، چې ټول لګښت یې دوی په غاړه اخیستی.
