ارزګان کې د سنګر دښت ښارګوټي لپاره تفصیلي پلان چمتو شو
۱۴۴۶/۰۶/۲۴
ارزګان ولایت کې د کور او ښار جوړولو ریاست محترم رئیس ملا روح الله ابو احمد وایي، د چورې ولسوالۍ محترم ولسوال، د کور او ښار جوړولو ریاست او د ښاروالۍ ریاست محترمو انجنیرانو، د چورې ولسوالۍ محترم ښاروال، د کرنې او مالدارۍ محترم مدیر په ګډون یې، د چورې ولسوالۍ د سنګردښت ښارګوټي له ساحې لیدنه وکړه.
ښاغلی ملا ابو احمد وایي، د سنګردښت ښارګوټي لپاره پر (520) جریبه امارتي ځمکه تفصیلي پلان جوړ شوی، چې د سنګردښت په ساحه کې به یې د تطبیق لپاره ګډ تصمیم ونیول شي.
نوموړی وایي، د ولس او ولایت محترم مقام تر هوکړې وروسته به د یاد ښارګوټي د تفصیلي پلان د پلي کېدا لړۍ پیل شي.
هغه زیاته کړه، د دغه پلان په تطبیق سره به د چورې ولسوالۍ ولسونو ته په ښارګوټي کې د اوسیدو او سوداګرۍ سربېره د کار کولو زمینه برابره شي.
د کور او ښار جوړولو وزارت هڅې پیل کړي چې د هېوادوالو لپاره په کور دننه د مناسبې سرپناه برابرولو ترڅنګ د سوداګرۍ او کار کولو زمینې برابرې کړي.
