کور او ښار جوړولو وزیر د جلال اباد له نوي ښارګوټي لیدنه وکړه
۱۴۴۷/۶/۹
د کور او ښار جوړولو وزارت وزیر الحاج مولوي نجیب الله حیات حقاني، ختیځ زون ته د خپل سفر په ترڅ کې، د ننګرهار ولایت د جلال اباد ښار له نوي ښارګوټي څخه لیدنه وکړه.
ښاغلي وزیر د دې لیدنې اساسي موخه د نوي ښارګوټي د پرمختګ، ستونزو، او موجود وضعیت له نږدې ارزونه وه، څو د عملي کارونو د چټکتیا په اړه زمینه برابره شي.
محترم وزیر الحاج مولوي نجیب الله حیات حقاني، تمه لري چې د پروژې تطبیقي چارې لا منظمې او ګړندۍ شي.
د کور او ښار جوړولو وزارت، هڅې کوي، تر څو خلکو ته د معیاري مسکن، مناسبې سرپناه او ښاري خدمتونو د برابرولو زمینه نوره هم پراخه کړي او په سیمه کې اقتصادي فعالیتونه په مثبت ډول را وپاروي.
د جلال اباد نوی ښارګوټی د ښار په سرخ دېوال سیمه کې موقعیت لري، چې د جلال اباد –تورخم مهمه لویه لاره پرې غځېدلې ده او د ستراتیژیک ارزښت له امله د ښار د پراختیا لپاره مهم او اړین بلل کېږي.
د کور او ښار جوړولو وزیر د یاد ښارګوټي د چارو د لا ښه همغږۍ او پرمختګ لپاره اړوندو مسوولینو ته لازمې سپارښتنې وکړې او ټینګار یې وکړ چې وزارت به د خلکو د هستوګنې د اړتیاوو پوره کولو په برخه کې خپلې هڅې لا پیاوړې کړي.
