په لغمان ولایت کې د مهاجرینو لپاره د دوهم ښارګوټي د پلان تطبیق او د استوګنیزو نمرو د ویش بهیر پراخ شو
۱۴۴۷/۱۱/١٧
د کور او ښار جوړولو وزارت محترم وزیر الحاج مولوي نجیب الله حیات حقاني له لوري د لغمان ولایت په دشت باباصیب سیمه کې د مهاجرینو لپاره د دوهم ښارګوټي د تفصیلي پلان د تطبیق او د استوګنیزو نمرو د ویش بهیر پراخ او چټک شو.
په همدې مناسبت جوړې شوې غونډې کې د کور او ښار جوړولو وزارت محترم وزیر، الحاج مولوي نجیب الله حیات حقاني، د لغمان ولایت محترم والي قاري بختیار معاذ، د اړوندو ادارو مسؤلینو او یو شمېر مهاجرینو ګډون کړی وو.
د کور او ښار جوړولو وزارت محترم وزیر په خپلو خبرو کې ټینګار وکړ، چې اسلامي امارت ژمن دی څو ټولو مهاجرینو ته د استوګنې لپاره مناسب شرایط برابر کړي.
نوموړي څرګنده کړه چې هرې کورنۍ ته به پنځه بسوې ځمکه ځانګړې شي او د نمرو د ویش بهیر به په بشپړ شفافیت او حساب ورکونې سره ترسره شي، څو د هر ډول احتمالي درغلیو مخنیوی وشي.
نوموړي همداراز اړوندو مسؤلینو ته لارښوونه وکړه، چې په دغه ښارګوټي کې د نمرو د ویش چارې دې لا چټکې کړي او ټول بهیر دې د ټاکلي مهالوېش له مخې، په شلو ورځو کې بشپړ کړي.
ورپسې د لغمان ولایت محترم والي قاري بختیار معاذ وویل، چې ولایتي اداره ژمنه ده څو د یاد بهیر په اغېزمن مدیریت کې همکاري وکړي او د مهاجرینو لپاره د نمرو د عادلانه ویش زمینه برابره کړي.
د کور او ښار جوړولو وزیرڅرګنده کړه، چې تردې وړاندې د لغمان ولایت په کافر ګله سیمه کې د استوګنیزو نمرو ویش بشپړ شو چې اوس د دشت بابا صیب د ښار ګوټي ویش تازه پیل شو.
د یادونې وړ ده چې د دشت باباصیب ښار ګوټی په ۱۳۲۵ جریبه ځمکه کې ډیزاین شوی چې (۲۲۱۰) استوګنیزې نمرې لري او د ژوند نورو ټولو برخو ته پکې پاملرنه شوې ده.
پر دې سر بیره (۱۰۰۰۰) لس زره جریبه نوره ځمکه په لغمان ولایت کې نوره امارتي تثبیت شوې، چې د منظم او معیاري پلانونو له مخې به ډیزاین او پر مهاجرینو به وویشل شي.
