لغمان ولایت ته د ښاري تخلفاتو د مخنیوي په موخه یو باصلاحیته هیئت سفر وکړ
۱۴۴۷/۹/۴
د کور او ښار جوړولو وزارت د محترم مقام د حکم له مخې، د دغه وزارت د ښاري تخلفاتو د مخنیوي محترم ریاست د رئیس په مشرۍ یو با صلاحیته هیئت، لغمان ولایت ته سفر وکړ.
په دغه سفر کې، چې له ښاري سرغړونو د مخنیوي او د انکشافي پروژو پر تطبیق د څار محترم عمومي ریاست په همغږۍ ترسره شو، په نوموړي ولایت کې د دویمو او درېیمو واحدونو د کړنو بهیر، د طرزالعمل او د فعالیتونو د پرمختګ کچه په هر اړخیز ډول وڅارل شوه.
د دغه سفر موخه نه یوازې د ښاري تخلفاتو مخنیوی و، بلکې د یاد ولایت محترم مقام، د لغمان ولایت د ښاروالۍ محترم ریاست، په دغه ولایت کې د کور او ښار جوړولو محترم ریاست او دغه راز د نورو اړوندو ادارو ترمنځ د لا پیاوړې او بشپړې همغږۍ او همکارۍ رامنځته کول و.
د کور او ښار جوړولو وزارت، له ښاري تخلفاتو د مخنیوي محترم ریاست وایي، هلته یې د ښاري تخلفاتو د مخنیوي او د اړوندو ادارو ترمنځ د همغږۍ او همکارۍ روحیې د پیاوړتیا په موخه د ولایت محترم مقام د بشپړې پاملرنې غوښتنه وکړه.
د ښاري تخلفاتو د مخنیوي ریاست په خبره، د لغمان ولایت د امنیې محترمې قوماندانۍ سره خبره شریکه کړه، چې د ورسپارل شوي مکتوب له مخې د کور او ښار جوړولو ریاست له همکارانو سره هر اړخیزه همکاري وکړي او یو با صلاحیته استازی ورو پېژني.
د کور او ښار جوړولو وزارت تمه لري، چې د دغه سفر پایلې او لاسته راوړنې به په نوموړي ولایت کې د ښاري سرغړونو د مخنیوي د بهیر د چټکتیا او د ښاري پلانونو د لا ښه او منظم تطبیق لپاره بشپړه زمینه برابره کړي.
