په کابل کې د امارات ښارګوټي له اوسېدونکي سره ناسته وشوه
۱۴۴۶/۱۱/۱۶
د کور او ښار جوړولو وزارت د مسکن، ودانیزو چارو او برنامو د پراختیا محترم مرستیال الحاج محمد اسماعیل فایز، د امارات ښارګوټي له یو شمېر اوسېدونکو سره وکتل او د یاد ښارګوټي د شته ستونزو د حل په اړه یې بحث وکړ.
په دې غونډه کې، یو شمېر خلکو د نورو په استازیتوب خبرې وکړې او د دې ښارګوټي د اساسي نیمګړتیاوو په توګه یې د جوماتونو، ښوونځیو، کلینیکونو، سپورټي میدانونو، معیاري تشنابونو او د اوبو لګولو او شنه کولو لپاره د اوبو د تصفیه خونو نشتوالي په ګډون یو لړ موجوده ستونزې یادې کړې.
د مسکن، ودانیزو چارو او د برنامو د پراختیا محترم مرستیال وویل، د امارات ښارګوټي د ستونزو حل برخه کې به خپلو هڅو ته دوام ورکړي او له ټولو ممکنه لارو چارو به کار واخلي.
نوموړي وویل، د کور او ښار جوړولو وزارت هڅه کوي، د هېواد په کچه ښارونه د ماسټر پلانونو له مخې پراخ او معیاري کړي، څو خلک له ښاري خدمتونو پراخه ګټه پورته کړي او ښاري خدماتو ته اسان لاسرسی ولري.
