د کور او ښار جوړولو وزارت محترم وزیر د لوګر د خلکو غوښتنې واورېدې؛ د ستونزو د حل لپاره عملي ګامونه پورته کېږي
۱۴۴۷/۱۰/۲۱
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې، د لوګر ولایت له یو شمېر مخورو سپین ږیرو او قومي مشرانو سره وکتل.
په دې ناسته کې، د لوګر ولایت دغه یو شمېر استازو د خپلو سیمو ستونزې او اړتیاوې په تفصیل سره شریکې کړې او په ځانګړې توګه د مهاجرینو لپاره د ښارګوټو د جوړولو، د ځمکو د وېش بهیر، د سرپناه نشتون، د سړکونو، اوبو رسولو، برېښنا او نورو بنسټیزو خدماتو د کمښت په اړه خپلې اندېښنې څرګندې کړې.
د پلان شویو ښارګوټو چارې عملي پړاو ته داخلول او وېش، نورې هغه غوښتنې وې، چې یادو مشرانو یې هیله درلوده، څو راستنېدونکو کورنیو ته مناسب استوګنځایونه برابر شي.
د کور او ښار جوړولو وزارت محترم وزیر الحاج مولوي نجیب الله حیات حقاني، د پلاوي خبرې په غور واورېدې او څرګنده یې کړه، چې د هېواد په کچه د ښاري پراختیا، د مهاجرینو د ستونزو حل او د معیاري ښارګوټو جوړول خپل اساسي مسؤلیت بولي.
ښاغلي وزیر زیاته کړه، په لوګر ولایت کې به د ښارګوټو اړوند پروژې له تخنیکي پلوه وڅېړل شي او د عملي کېدو لپاره به یې لازم ګامونه پورته شي.
ښاغلي حقاني، اړوندو ریاستونو ته هدایت ورکړ، چې د یادو ستونزو د حل لپاره مشخص پلانونه ترتیب کړي او له نورو همکارو ادارو سره په همغږۍ عملي اقدامات ترسره کړي.
هغه همدارنګه ټینګار وکړ چې د خلکو غوښتنو ته پر وخت رسېدنه او د خدماتو عادلانه وړاندې کول د وزارت له مهمو لومړیتوبونو څخه دي.
د لوګر ولایت مخورو او قومي مشرانو د محترم وزیر الحاج مولوي نجیب الله حیات حقاني، له پاملرنې او همکارۍ څخه مننه وکړه او هیله یې وښوده چې یادې ژمنې به په عملي اقداماتو بدلې شي، څو د سیمې د خلکو اوږدمهاله ستونزې هوارې او د ژوند شرایط یې ښه شي.
