د میدان وردګ ولایت د کوتل تخت صنعتي پارک لپاره تفصیلي پلان چمتو او تر هر اړخیزو ارزونو وروسته تائید او لاسلیک شو
۱۴۴۷/۹/۲۲
د کور او ښار جوړولو وزارت، محترم وزیر الحاج مولوي نجیب الله حیات حقاني په خپل کاري دفتر کې، د میدان وردګ ولایت د کوتل تخت اړوند د صنعتي پارک لپاره جوړ شوی تفصیلي پلان تائید او لاسلیک کړ.
د کوتل تخت صنعتي پارک د میدان وردګو ولایت له مهمو اقتصادي پروژو څخه یوه ده، چې د صنعت د پراختیا، د کارموندنې د فرصتونو رامنځته کولو او د پانګونې د جذب په موخه جوړ شوی دی.
دا پارک د کوتل تخت په سیمه کې، میدان ښار ته نږدې موقعیت لري او د کابل ښار سره نسبتاً لږ واټن لري، چې همدا نږدېوالی بازارونو او ترانسپورتي شبکو ته لاسرسی اسانه کوي.
د دې صنعتي پارک مساحت شاوخوا ۲۰۰ جریبه ځمکه په پام کې نیول شوې، چې د ګڼ شمېر فابریکو او تولیدي تأسیساتو د جوړېدو ظرفیت لري.
اټکل کېږي چې شاوخوا ۷۰ تولیدي فابریکې به په کې جوړې شي، چې پر بېلا بېلو تولیداتو به کار پیل کړي.
د دې صنعتي پارک په فعالېدو سره به د میدان وردګو ولایت او شاوخوا سیمو خلکو ته تر زرګونه مستقیم او غیر مستقیم کاري فرصتونه برابر شي.
همدارنګه کابل ته د دې پارک نږدېوالی دا اسانتیا برابروي چې تولیدات یې په اسانۍ سره لویو بازارونو ته انتقال شي.
